August 31, 20187 yr MAASIN, Iloilo - Patay ang isang 16-anyos na dalagita matapos siyang barilin ng kinakasama ng kaniyang ina, Huwebes. Sa kusina ng kanilang bahay sa Barangay Buntalan pinagbabaril ng 38-anyos na suspek ang biktimang si alyas Faye dahil sa pagtatalo umano sa cellphone. "Pinipilit ng suspek na basahin ang mga mensahe na laman ng cellphone ng biktima pero dahil may password ay nag-agawan ang dalawa na nauwi sa pagtatalo," sabi ni Joseoswald Gatuslao, hepe ng Maasin Police. Tinangka ng ina ng biktima na agawin ang baril mula sa suspek at sinabihan si Faye na tumakbo, ngunit nagpumiglas ang suspek at inabutan ang dalagita sa kusina, sabi ni Gatuslao. Agad ikinamatay ng biktima ang mga natamong tama ng bala sa ulo, dibdib at kamay. Patuloy na hinahanap ng mga pulis ang nakatakas na suspek. Tumangging magbigay ng pahayag ang ina na 10 taon nang kinakasama ng suspek. Sasampahan ang suspek ng kasong murder. -ABS-CBN NEWS
Create an account or sign in to comment